அடுத்து, கவனத்தை ஈர்த்தக் காற்பந்து குழு Iceland ஆகும். அர்ஜெண்டினா குழுவிற்குச் சவால் கொடுத்துக் கதிக்கலங்க வைத்தது என்று சொல்லலாம். அடுத்ததாக இரண்டுமுறை உலகக் கிண்ணத்தை வென்ற பிரான்ஸிக்குக் கடுமையான போட்டியைக் கொடுத்த ‘ஆஸ்ட்ரோலியா’ ஆகும். அவ்விளையாட்டில் ஆஸ்ட்ரோலியா 2-1 என்று தோல்வியடைந்தாலும் மிகச் சிறப்பான போட்டியை உண்டாக்கியது என்றே சொல்லலாம்.

அடுத்து, போர்த்துகல், ஸ்பேய்ன் அணி மோதிய விளையாட்டுக் கவனித்தக்கது ஆகும். இரண்டுமே பலம் வாய்ந்த அணி. ஆனாலும், ஸ்பேய்ன் சிறப்பாக விளையாடியது என்றே சொல்ல வேண்டும். ரொனால்டோ ஒருவர் இல்லையென்றால் போர்த்துகல் 3 கோல்கள் அடித்திருக்குமா என்கிற கேள்வியும் நம்மிடையே உள்ளது.

அடுத்து, நம் எதிர்ப்பார்ப்புகளை உடைத்த அணிகள் வரிசையில் முதல் நிலையில் ஜெர்மனி ஏமாற்றத்தை உருவாக்கியுள்ளது. வாய்ப்பை நழுவவிடுதல் என்பது ஒரு பக்கம் இருக்க, ஜெர்மனி வாய்ப்பை உருவாக்கவே இல்லை என்பது பல இரசிகர்களின் மனக்குமுறல்.

அடுத்து, ஏமாற்றத்தை ஏற்படுத்திய அணி அர்ஜெண்டினா ஆகும். குறிப்பாக கிடைத்த அருமையான வாய்ப்பை ‘மெஸ்ஸி’ நழுவவிட்டது இரசிகர்களின் அதிருப்தியைக் கிளப்பி விட்டது. ‘ஐஸ்லேண்ட்’ போன்ற மிகச் சிறிய நாடு உலக அரங்கத்தில் இத்தனை வீரியத்துடன் எழுந்து நின்றது இதற்கு முன் உலக அளவில் ஜாம்பவான் என்று இடத்தைத் தக்கவைத்திருந்த அணிகளுக்குப் படிப்பினை என்றே சொல்லலாம்.

நடுவில் இருந்து கொண்டு ஆச்சர்யத்தை உண்டாக்கிய அணி, பிரேசில் ஆகும். திறமையாக ஆடினாலும் வாய்ப்புக் கிட்டவில்லை. குறிப்பாக ‘நெய்மார்’ காலில் பந்து வந்ததும் உடனே நான்கு எதிரணி ஆட்டக்காரர்கள் அவரைச் சூழ்ந்து நின்று தாக்குகிறார்கள். வாய்ப்பிருப்பின் பிரேசில் முன்னேறும்.

ஆயினும், பந்து என்பது அனுமாணிக்க இயலாத ஓர் அதிசயம். யாரையும் எங்கும் நிறுத்தும். பொறுத்திருந்த பார்ப்போம். என்னளவில் இவ்வாண்டு உலகக் கிண்ணத்தை ‘ஸ்பேய்ன்’ வெல்ல வாய்ப்புண்டு என்றே தோன்றுகிறது.

-கே.பாலமுருகன்